Asawa aksidenteng nasanggot sa bana

CEBU, Philippines - Samdan ang usa ka asawa human kini aksidenteng natigbasan og sanggot sa iyang bana didto sa ilang balay sa barangay San Antonio, lungsod sa Bogo sa miaging gabii.

Ang biktima giila nga si Maria Andrino, 46, nga nagpuyo sa maong barangay tipon sa suspetsado nga si Jimmy Andrino, hingkod, nga iya ra usab nga bana.

Sigun sa kapolisan , sa wala pa mahitabo ang pagpanigbas , ang suspetsado hubog nga miabot sa ilang balay ug nagkalalis ang magtiyaon tungod sa problema bahin sa panginabuhi.

Ang bana nga init nang daan og ulo gumikan sa gilala niining ilimnong makahubog, giingong mikuha og sanggot.

Ang tuyo unta mao lang ang paghadlok sa iyang asawa, apan giingong aksidenteng na-igo ang siko sa iyang asawa sa nagsinaw-sinaw nga suwab sa hait kaayong sanggot.

Maayo nalang kay wala   maputol ang siko sa asawa ug dali kining gihatod sa suspetsado ngadto sa Severo Verallo Memorial District Hospital. Sa pakighinabi sa Banat News kang SPO2 Ronaldo Rosaceña, kini mibutyag nga walay planong mopasaka og kaso ang asawa batok sa iyang bana.  (BANAT NEWS)