Napiling mayor mihangyo sa Comelec

CEBU, Philippines - Ang napiling mayor sa lungsod sa Compostela nga si Joel Quinio mihangyo sa Commission on Elections (Comelec) sa pag-resulbar sa labing daling panahon sa election protest sa ilang lungsod aron makalingkod na silang mga napiling opisyal sugod karong bag-ong tuig.

Sa samang higayon si Quinio mipasidaan sa mga kadagkuan sa Comelec sa dakong peligro nga motumaw ang kagubot sa lungsod kun hangtod sa sunod tuig magpabiling walay makalingkod nga mayor, bise mayor ug mga konsehal sa ilang lugar.

Dugang ni Quinio nga nahadlok siya nga dili na unya siya makapugong sa iyang mga supporter kun dili na kini mosubay sa hustong mga lagda karong nagpanikad na kini nga maproklamar nga mananaug niadtong milabay’ng eleksiyon sa Mayo 10.

Gipasabot ni Quinio ang lain niyang gikabalak-an mao ang dakong kalagmitang pagtumaw unya sa katalagman sa ilang lungsod sama pananglit sa diarrhea outbreak nga nahitabo sa siyudad sa Danao ug wala nay makaatiman niini.

Kini tungod kay walay bisan usa ka konsehal ang lungsod sa Compostela nga makasuperbisar ug makahimo og dinaliang lakang aron sa pagdeklarar sa state of calamity sa lungsod. (BANAT NEWS)