Nanghinol sa dalagita napriso

CEBU, Philippines - Usa ka bayong –bayong gipasakaan og kaso human kini masakping nanghinol sa lawas sa usa ka dalagitang anak og boksidor samtang natulog sa ilang balay sa sitio Capusoan sa barangay Cambaro, dakbayan sa Mandaue sa miaging gabii.

Si Inspector Ramil Morpos, hepe sa Investigation Detection and Management Bureau (IDMB) sa Mandaue City Police Office (MCPO) mibutyag sa Banat News nga mitahang malinawon sa ilang buhatan ang bayong-bayong kansang ngalan gipugngan.

Matud pa ni Morpos nga human hisakpi sa akto ang suspetsado, dali kaayo kining nakaikid sa bintana ug milayat kini, dayon mikaratil og dagan pahilayo sa maong lugar sa kabalaka nga panitan siya sa mga tagtungod sa iyang gihinol nga dalagita.

Hinuon tungod malagmit sa kabalaka sa mahitabo niya, mitunga kini ngadto sa buhatan sa kapolisan nga kuyog sa inahan aron sa pagtahan sa iyang kaugalingon.

Dihang giimbestigar, giangkon sa bayongbayong nga hubog siya niadtong higayona hinungdan nga nakasulod siya sa lawak sa dalagita apan wala niya kini panamastamasi.

Samtang ang dalagita namahayag usab nga nahinanok siya og katulog sa maong higayon ug mao nalay namat-an niya nga gidigo ang iyang lawas og perfume sa suspetsado.

Bisan pa sa maong pagpanghimakak, ang suspetsado ang gipasakaan gihapon og kaso sa tagtungod. (BANAT NEWS)