Mga high-powered nga armas nasakmit sa Guadalupe

CEBU, Philippines - Tulo ka tawo ang nadakpan sa kapulisan human makuhai’g mga high- powered nga armas sa dihang gialarma sa kapulisan kagahapon sa udto diha sa Road Queensville Subdivision, sitio Nabuntoran sa barangay Guadalupe dakbayan sa Sugbu.

Ang gidakop mao sila si Teodorico Adarna Jr., 31, taga Punta Engaño, Lapulapu City; Reynaldo Castrodes, 55, taga Paradise Village, Banilad dakbayan sa Sugbu ug Jaime Daño, 43, taga Punta Engaño Lapulapu.

Sila gikatahong nakuhaan og armas sa kapulisan sa Guadalupe ug mga sakop sa Special Weapons and Tactics sulod sa sakyanan nga Mitsubishi Hi-Lux nga nagtangag sa plakang JIM-500.

Naalarma ang kapulisan human mireklamo ang mga residente sa dapit nga sila si Cresencio Gacayan, 62, ug asawa niini nga si Teresita, anak nga si Cresencio Jr., Virgilio Gabuya, 36, ug Alberto Hermo nga umagad sa pamilyang Gacayan nga nagpasalba duha ka higayon ang grupo ni Adarna sa dihang naabot sa dapit sakay sa maong sakyanan.

Sumala pa nga nagkasungi nang daan ang duha ka habig, tungod sa giingong road right of way diha sa nahisgutang subdivision.

Ang mga sakop sa SWAT nga miresponde sa maong alarma miimbitar nga dad-on ang sakyanan ngadto sa police station ug didto nakit-an ang usa ka Baby Armalite nga dunay magazine, usa ka .9mm, duha ka .45 pistol dunay upat ka magazine nga puno sa mga bala.

Hinuon nakapakita sila og permit to posses firearms apan si Chief Insp. Mario Monilar miingon nga ilaha pang susihon ngadto sa Firearms, Explosive Security Agency and Guards Supervisory Section (Fesagss)-7.

Ang mga dinakpan gidala kagahapon sa PNP Crime Laboratory aron sila ipaubos sa paraffin test aron masuta kung si kinsa kanila ang nagpasalba sa armas.

Si Monilar nagkanayon nga ilang gikunsiderar nga arrested ang tulo ug ilang pasakaan og kasong grave threat, illegal discharge ug illegal possession of firearms sanglit walay permit to carry outside residence ang tulo.

Nakakuha og numero sa telepono ni Castrodes ang Banat News apan walay motubag niini dihang gisuwayan pagkuha ang ilang habig. (BANAT NEWS)