SKF sa Talisay gidaog sa antog sa sensilyo

CEBU, Philippines - Gidaog lang sa ‘toss coin’ kon antog sa sensilyo kagahapon sa buntag ang gipahigayong eleksiyon sa mahimong presidente sa Sangguniang Kabataan Federation (SKF) sa dakbayan sa Talisay diha sa People’s Hall.

Si Carmel John Burlas, fourth-year high school sa Saint Scholastica ug apo sa kanhi konsehal sa munisipyo sa Talisay nga si Diogracias Burlas maoy midaog batok ni Val Joseph Ylanan, 16-anyos ug fourth-year high school sa Cebu Sacred Heart College, presidente sa SK sa barangay Linao ug anak ni city councilor Val Ylanan. Ang duha parehong nakakuha 11 botos matag usa ug aron magdaog gipahigayon ang “toss coin” si Val Joseph mipili sa “head” o “hari” ug kang Burlas “tail” kung “patay.

Unang miantog sa P5 nga sensilyo ang Sangguniang Panglunsod Secretary nga si Emigdio Enjambre ug pagtugpa sa sawog “tail” ang resulta sunod nga miantog sa sensilyo si Talisay City Comelec officer Corazon Moran ug “tail” gihapon hinungdan nga wala na makaantog ang Department of Interior and Local Government (DILG) officer nga si Bertilio Pasilang.

Ang mga sakop sa media mireklamo sa pagdili kanila nga makasulod diha sa People’s Hall aron unta mokober sa maong botasyon alang sa ‘transparency.’ Si Pasilang nga nahinabi sa mga tigbalita miingon nga ‘aron dili masamok’ maong wala siya motugot nga may mokober nga media tungod kay ubos sa guidelines ang hepe sa kapolisan, academe ug religious sector lang ang gitugutang panel of observers.

Samtang sa Cebu City midaog batok sa duha ka kaatbang si John Philipp Po sa barangay Santo Niño nga nakakuha og 65 ka botos batok sa pito ug unom ka botos. (BANAT NEWS)