CEBU, Philippines - Duha ang patay sa managlahing aksidente sa kadalanan sa probinsya sa Sugbo niadtong miaging adlaw.
Si Mansueto Cerencio, 74, molupyo sa barangay Liloan patay diha-diha human nadasmagan og Sunrays Bus sa barangay Looc, Santander nga gimaneho ni Ruel Cabanasmanos, 35, ug nagpuyo sa barangay Poblacion.
Si PO2 Noel Estender sa Santander Police Station mibutyag nga ang biktima naglakaw sa walang bahin sa dalan padulong sa barangay Looc pasado alas-5 ang takna sa hapon dihang nadagit sa kusog nga bus nga padulong na mogarahe.
Sigon sa imbestigasyon, ang drayber sa maong pasaheroan nagmaneho nga hubog base sa resulta sa liquor test sa Oslob District Hospital.
Ang drayber misuway og ikyas ug didto natulog sa balay sa iyahang ig-agaw apan nadakpan kini tungod kay giadto ang balay sa mga miresponde nga mga pulis.
Kasamtangang natanggong sa Santander Police Station ang drayber diin kini gipasakahan og kasong wreckless imprudence resulting to homicide.
Samtang sa laing bahin, patay ang drayber sa motorsiklo nga si Luciano Canamucan, 50, residente sa Basak Compostela human mabanggai sa mini bus nga gimaneho ni Beinvenido Capuyan Jr., 50, taga dalan Burgos sa Carmen.
Si PO3 Ralphie Flores sa Lilo-an Police Station nagkanayon nga ang motorsiklo padulong sa habagatang bahin sa Sugbo samtang ang minibus padulong sa amihanang bahin.
Nagbangga ang duha ka sakyanan diha sa National Highway sa Tabuc Tulay, barangay Cutcot Lilo-an nga maoy hinungdan sa hinanaling kamatayon sa drayber sa motorsiklo.
Giingong nakig-areglo ang operator sa maong bus. (BANAT NEWS)