Empleyado sa bangko may warrant sikop

CEBU, Philippines - Arestado ang usa ka kawani sa usa ka bangko nga adunay kasong attempted murder diha sa dalan Escario sa barangay Camputhaw dakbayan sa Sugbu.

Ang nadakpan pinasikad sa warrant of arrest sa kasong attempted murder giila nga mao si Erwin Antipuesto, taga Demaluna, Ozamis City ug kasamtangan nagpuyo sa barangay Casili lungsod sa Consolacion.

Ang WOA giisyu ni Maria Nimfa Penaco-Sitaca presiding judge sa Regional Trial Court didto sa Oroqueta City.

Si Chief Insp. Michael Anthony Bastes, hepe sa Fuente Police Station mitug-an sa mga tigbalita nga usa ka opisyal sa kapulisan didto sa Oroqueta City nga kanhi niya classmate sa kolehiyo maoy mikontak kaniya human nakadawat og impormasyon nga ang suspek nagtrabaho sa usa ka bangko dinhi sa Sugbu.

Matud pa ni Bastes nga nahitabo ang krimen didto sa Mindanao niadtong Oktobre 2002 ug migawas ang WOA pagka Hunyo 30, 2003 diin ang iya untang target sa pagpamusil mao ang usa ka lalaki apan ang naigo mao hinuon ang usa ka babaye.

Human nadawat ni Bastes ang kopya sa WOA, nakig-alayon siya sa Cebu Bankers Club aron pangitaon si Antipuesto ug nasuta nga nagtrabaho kini sa usa ka rural bank isip loan releaser.

Niadtong Miyerkules sa alas 12:30 sa udto gidakop nila ni Bastes si Antipuesto apan nakapiyansa kagahapon ang suspek sa kantidad nga P120 mil uban sa iyang abogado.

Gisusi na ni Bastes ang background sa suspek kun may uban pa kining kalambigitan sa ubang krimen.

Matud ni Bastes nga naghigpit sila karon gumikan sa nadawat nga intelligence report nga adunay grupo sa Mindanao ang nangabot ug may target nga bangkong tulison.

Tungod niini si Bastes subling mipasidaan sa tagdumala og mga bangko ug establisamento nga kinahanglan sutaon maayo ang backgroud sa ilang mga aplikante pinaagi sa dokumento nga ilang gikinahanglan. - BANAT NEWS