Na-entrap nga polis mihimakak sa pasangil

CEBU, Philippines - Hugot nga nanghimakak ang pulis nga gipasanginlang protektor sa carnapping diha sa dakbayan sa Mandaue sa dihang gipatawag siya kagahapon sa buntag sa buhatan sa pangulo sa kapulisan sa lalawigan nga si Sr. Supt. Erson Digal.

Si PO2 Bernie Baratilan miingon nga wala siyay kalabutan niana ug labaw sa tanan wala usab siya makaila ni Kevin Cimafranca, 19, nga taga Subangdako, dakbayan sa Mandaue kinsa mipasangil kaniya nga siya maoy protector sa carnapping.

Nasayran si Cimafranca tungod sa pagmaneho nga walay lisensya ug walay plaka ug mihingalan sa maong polis nga maoy iyang protector. 

Tungod niini gihimo ang entrapment operation sa mga sakop sa Investigation and Detective Management Branch (IDMB) sa Mandaue City Police Office (MCPO) diha sa Hernan Cortes St. sa barangay Alang-alang.

Ang mga sakop sa IDMB nagpakaaron-ingnong buyer sa XRM motorsiklo nga walay plate number sa kantidad og P5 mil. Si Insp. Ramil Morpos pangulo sa IDMB mi-text dayon ni Baratilan gamit ang cellphone ni Cimafranca nga magkita sila sa North Reclamation Area aron ihatag ang bayad sa motorsiklo.

Sa dihang naabot na si Baratilan, giimbitar dayon siya ni Morpos alang sa dugang imbestigasyon apan gi-release lang sab dayon gumikan kay kuwang kaayo og kompirmasyong gikarnap ang motorsiklo.

Si Cimafranca gibalhog sa detention cell human usab siya nakuhaan sa iyang posisyon og mga linikit nga marijuana ug gikasuhan og illegal possession of illegal drugs ug driving without license.Apan si Digal mitataw nga iyahang paabuton ang criminal complaint gikan sa MCPO ug ang Provincial Intelligence Branch (PIB) mao nay iyang tahasan sa dugang imbestigasyon batok kang PO2 Baratilan. - BANAT NEWS