Drayber giluba sa laing drayber

CEBU, Philippines - Samdan sa kilid ug uban pang bahin sa lawas ang usa ka drayber sa traysikad nga gidunggab sa kauban niining drayber didto sa barangay Babag, dakbayan sa Lapulapu, sa miaging kaadlawon.

Ang biktima mao si Harold Agosto, 28, ulitawo, samtang ang suspetsado   mao si Crispulo Arce, hingkod ug pulos taga Babag.

Sa imbestigasyon nga gihimo nila ni PO3 Dioscoro Arong sa homicide section sa kapolisan sa maong dakbayan nasayran nga mihangyo ang suspetsado nga mosakay sa traysikad sa biktima apan gibalibaran kini ug didto nagsugod ang ilang lalis hangtod nga nagkasinumbagay.

Unya gipakgang sila sa mga kauban nilang drayber, busa mipauli ang suspetsado apan mibalik kini nga nagdala na og kutsilyo ug dayong dunggab ngadto sa biktima.

 Dihang nasuta niini nga natusak na sa samad ang lawas sa biktima misibat dayon.

Samtang gihatod ngadto sa tambalanan ang biktima, gipangita usab sa kapolisan ang suspetsado. – BANAT NEWS