Killer sa anak ni Aton gipanid-an

CEBU, Philippines - Ang kapolisan may gipanid-an na karong tawo nga suspek sa pagpusil patay sa anak ni Mike Aton , sumala ni Superintendent Henry Biñas, hepe sa Talisay City Police kagahapon.

Matud ni Biñas nga giadto nila ang balay sa suspetsado apan nakasibat na kini.

 Si Neilman Aton gipusil patay niadtong Miyerkules sa buntag sa usa ka wala mailhing lalaki samtang nagsakay kini og traysikad paingon sa garahean sa Shurie taxi nga iyang gidrayban sa barangay Tangke, dakbayan sa Talisay.

Si SPO4 Jack Aton , maguwang sa biktima, kinsa kaabag usab sa kapolisan sa Talisay sa pag-imbistigar sa maong kaso miingon nga wala siyay nahipos nga impormasyon nga may kontra ang iyang igsoon.

Hinuon usa sa mga nakasaksi ug nakaila sa suspetsado maoy nanggiya kanila sa balay niini sa barangay Inayawan , dakbayan sa Sugbo kansang ngalan gipugngan una sa pagkakaron.

Gitutokan sa mga polis karon nga ang motibo sa hitabo mao ang personal nga bangi. – BANAT NEWS