17-anyos gi-'samurai' suspek mitahan

CEBU, Philippines - Boluntaryong mitahan sa kaugalingon ang gipasanginlang suspek sa pagpatay sa usa ka 17-anyos nga lalaking menor de edad nga napalgan sa kasagbotan nga may samad tinigbasan sa ulo niadtong Huwebes sa gabii didto sa barangay Pitalo lungsod sa San Fernando.

Si Dave Sayago, 35, molupyo sa nahisgutang lugar gisugat sa iyang mga kabanay ug kapulisan nga gipangulohan ni Insp. Carlos Reyes uban sa iyang mga sakop diha sa pantalan sa Pier 5 gikan sa Masbate human nakahukom nga motahan.

Si Sayago miangkong maoy mipatay kang Joseph Dialagdon kinsa iyang gitigbas og ‘samurai’ niadtong miaging Huwebes sa gabii sa milabay’ng semana ug napalgan niana nang Biyernes sa alas-12 pasado sa udto sa kasagbotan nga gitabonan og dahon sa saging nga dunay dakong tinigbasan sa iyang ulo.

Si Sayago mipasangil sa biktima nga kini makatulo na ka higayong misulod sa ilang balay sugod pa niadtong milabay’ng tuig ug kanunay siyang makawatan.

Nianang iyang napatay ang biktima kini mibutyag sa mga tigbalita diha sa iyang karsel nga nakit-an niya ang usa ka lalaki nga nagtaptap sa nawong diha sa ilang balay ug dihang iyang gisitar gidunggab siya og kalit niini apan natapi niya kini.

Hinungdan nga iyaha kining gigukod og samurai ug iyang natikdolan ang ulo ug nahagba, human niini nagpatabang siya sa higalang si Crislin Parba aron tabangan paglabay sa patay’ng lawas.

Human sa pipila ka adlaw mibiya ug miadto sa Manila apan nakonsensya siya ug mipauli tungod usab sa hangyo sa iyang amahan.

Si Insp. Reyes nga nahinabi sa Banat News mitug-an nga panimawos ang motibo sa pagpatay kang Sayago sanglit katulo na sab gikawatan ang panimay sa suspek.

Mipasabot si Reyes nga dili nila malakip sa pagpasaka og kaso si Parba sanglit igo ra kining gihangyo sa suspek nga motabang kaniya pagyayong sa biktima. (BANAT)