Apostol midepensa ni Santiago

CEBU, Philippines - Gidapigan ni Deputy Ombudsman for the Visayas Sergio Apostol ang iyang sakop nga si Assistant Ombudsman Virginia Palanca-Santiago sa pasangil ni 3rd district Kong. Pablo John Garcia nga kini maoy mipublikar sa resulta sa imbestigasyon sa kontrobesyal nga pagpalit sa Kapitolyo sa Balili property.

Si Apostol miingon nga dili si Santiago ang mipagawas sa Final Evaluation Report (FER) ug siya maoy nagsugo nga hatagan og kopya ang mga sakop sa media nga mibisita sa iyang buhatan.

Matud pang Apostol nga wala siyay nakitang kasaypanan sa rules of procedure pagpagawas sa maong evaluation report sa imbestigasyon sa Balili controversy nga nag-ingong kinahanglang ipailawom sa pormal nga imbestigasyon ang maong kaso.

Si Santiago sa iyang bahin miingon nga isip tigpamaba ni Deputy Ombudsman for Visayas, Pelagio Apostol apil sa iyang trabaho ang pagsunod sa kamandoan niini.

“I have nothing against the Garcias. I don’t even know them. Sa kahasol ug kakapoy aning problemaha murag ganahan na gyud ko mo-retire,” nagkanayon si Santiago.

Kahinumduman nga si Santiago gihulga nga pasakaan og kaso ni Kong. Garcia kinsa nag ingon nga kalapasan sa rules of procedure of the Anti Graft Office ang gihimo ni Santiago. (BANAT)