CEBU, Philippines - Usa ka anak sa mediaman ang gipusil patay sa wala mailhing kriminal samtang kini nagsakay og traysikad kagahapon sa buntag diha sa sitio San Rafael, barangay Tanke, dakbayan sa Talisay.
Ang biktima mao si Neilman Aton, taga 77 Bliss, Labangon, dakbayan sa Sugbo ug drayber sa Shurie Taxi kinsa nakaangkon og unom ka samad pinusilan sa tuong bukton ug ang mga bala milahos ngadto sa iyang lawas nga maoy hinungdan sa iyang kamatayon.
Si Aton anak ni Mike Aton kinsa usa ka inilang komentarista sa radyo ug miyembro sa Sugboanong Komentarista nga Nagpakabana (SUKNA).
Si Supt. Henry Biñas, hepe sa Talisay City Police Station sa pakighinabi sa Banat News nagkanayon nga si Aton magarahian sa maong lugar.
Matud ni Biñas nga padayon pa sila og hipos og mga impormasyon sa hitabo apan wala nila isalikway ang anggulo nga posibleng dunay nakabangi ang biktima. Si PO1 Rosauro Pasumala kinsa usa sa imbestigador sa insidente sa pakighinabi niini sa Banat News kagahapon mibutyag nga si Aton nagsakay og traysikad paingon ngadto sa garahian sa taxi tungod kay mo-duty unta kini apan pag-abot diha sa tulay mitungha ang wala mailhing lalaki dayon gipusil ang biktima.
Matud ni Pasumala nga ang kriminal misutoy og dagan paingon ngadto ubos sa tulay human niini og pamusil.
Usa sa gisubay karon sa mga polis ang ulahing gipuy-an ni Aton aron masusi kung wala ba kini nakaaway diha sa maong dapit. Si Pasumala midugang nga base sa ilang nahipos nga impormasyon si Aton panagsa na lang mouli ngadto sa ilang balay sa Labangon.
Si SPO4 Jack Aton nga nadestino sa Mabolo Police Station maguwang sa biktima nga nahinabi sa Banat News kagahapon mibutyag nga ang iyang manghod panagsa na lang mopauli ngadto sa ilang balay sa Labangon tungod kay diha na kini magpuyo sa usa sa mga lugar sa dakbayan sa Talisay.
Ang pamilyang Aton nanghinaot nga madakpan ang kriminal aron mahatagan og hustisya ang kamatayon sa iyang manghud. (BANAT)