CEBU, Philippines - Nagsaulog sa ilang 9th founding anniversary ang Central Command (Centcom) pinaagi sa pagguba sa mga 127 ka tag-as nga kalibre sa armas nga nailog, gisurender, gikumpiskar ug nadiskubrehang mga armas.
Ang selebrasyon gipangulohan ni Army Support Command Commander nga si Major Gen. Josue Gaverza kagahapon pasado alas 6:30 sa buntag.
Ang mga armas nga gipangguba mao ang usa ka M203 grenade launcher; 15-M16 Armalite rifles; tulo ka M14 rifles, upat ka Garand rifles; 24 ka .30 Springfield rifles; 14 ka Carbine rifles; 34 ka .356 revolvers, .38 revolvers, .22 revolvers; unom ka kalibre .45 pistola, 16 ka Shotgun ug uban sa siyam pa ka nagkalain-laing armas lakip na mga paltik.
Si Gaverza nga nagsul-ob og goggles, apron, ug mask kauban si Centcom Commander Lt. Gen. Ralph Villanueva ug deputy commander Brig. Gen. Alejandro Estomo maoy nangulo sa pagguba sa mga pusil pinaagi sa pagputol-putol niini ginamit ang rotary blade.
“It was meaningful and symbolic activity which express the deep commitment of the armed forces in general to attain peace and progress,” matud pang Gaverza.
Si Gaverza nagkanayon nga ang narekober nga mga armas nagpakita nga malampuson ang ilang misyon.
Sa 127 ka mga armas pipila niini maoy gihimong ebidensya sa mga kaso sa korte. (BANAT)