CEBU, Philippines - Hingpit nga walay kontra ang magpapili sa dakbayan sa Mandaue alang sa pagka-presidente sa Association of Barangay Council (ABC) federation nga si Kapitan Ernie Manatad sa barangay Subangdaku.
Kini sa dihang si Barangay Kapitan Andres Suson sa barangay Pagsabungan nakahukom sa dili na lang pagpadayon sa iyang kandidatora alang sa maong katungdanan sa paghatag og higayon kang Manatad.
Giangkon ni Kapitan Suson nga tinguha unta niya nga mohupot sa katungdanan alang sa pagka ABC federation president apan nausab ang iyang tinguha ngadto na lamang sa pagka bise presidente sa ABC federation.
Sa nasayran nga si Manatad maoy labing suod ni Mayor Jonas Cortes sa mga napiling barangay kapitan sa dakbayan kinsa nahimo na niyang sinaligan sa iyang buhatan sulod na sa 11 ka tuig nga gidugayon.
Hinuon si Cortes dihang nahinabi sa mga tigbalita mipadayag sa dili pagpanginlabot sa piniliay alang sa ABC official sanglit iyang itugyan sa mga kapitan ang pagpili niini.
Dugang pa niya nga wala pa magtinguha sa maong katungdanan si Manatad hayan mahinayon usab siya sa pagkandidato alang sa maong posisyon.
Samtang si Kapitan Nelson Rubio sa barangay Umapad nga nahinabi sa Banat News mibutyag nga ilang himoon sa sunod semana ang pagpili og mga opisyal sa ABC didto sa Cebu International Convention Center (CICC) sa dakbayan sa Mandaue. (BANAT)