Bata, dalaga gilugos

CEBU, Philippines - Nagtingkagol sa Talisay City detention cell ang usa ka 30-anyos nga lalaki human kini pasanginling milugos sa 15-anyos nga bata niadtong Lunes sa kaadlawon diha sa sitio Dawis, barangay San Roque, dakbayan sa Talisay.

Ang suspetsado mao si Angelito Oros, residente sa maong dapit nasikop ni Kagawad Rafael Chan ug sa duha ka mga tanod sa barangay.

Base sa imbestigasyon sa Talisay City Women’s Desk nga sa wala pa mahitabo ang pagpanglugos ang bata natulog kini sa usa ka payag ug gipukaw sa suspetsado.

Ang bata mipasangil nga gihuboan siya og sapot ni Oros ug gilugos bisan pa sa iyang pagdumili human niini gibaharan sa suspek ang bata nga dili pasumbungon sa inahan.

Apan ang bata didto misumbong sa iyang amo ug ang amo na niya ang misumbong ngadto sa iyang igsuon kabahin sa nahitabo ug dayon mi-report ngadto sa opisyal sa ilang barangay.

Sa laing bahin, usa ka 27-anyos nga dalaga ang nabiktima sa pagpanglugos sa wala mailhing lalaki dihang paingon nang mopauli gikan nag-jogging niadtong Martes sa alas 5:30 sa buntag sa barangay Canhabagat, lungsod sa Medellin.

Base sa imbestigasyon sa kapolisan nga ang biktima giingong gitiunan og kutsilyo sa wala mailhing lalaki kinsa nagsul-ob og maskara unya gidala ngadto sa tunga-tunga sa katubhan sa nahisgutang barangay ug gilugos.

Human niini gikuha sa lalaki ang cellphone sa biktima.Ang biktima igo nalang misumbong sa kapolisan ug miingon nga adunay patik nga ‘dragon’ sa duha ka bukton ang rapist.

Si SPO2 Jose Valles sa Medellin Police Station nagkanayon nga posibleng ang maong hitabo giplano na sa maong lalaki tungod kay ang biktima halos matag adlaw kining mag-jogging. (BANAT)