Nanguryente'g isda sikop

CEBU, Philippines - Tulo ka mananagat kinsa migamit og kuryente sa pagpanakop og isda gidakop sa kapolisan didto sa barangay Ipil, sa lungsod sa Carmen sa miaging hapon.

Ang mga suspetsado mao sila si Gabriel Kiamko, 34, William Vasquez, 25 ug Gerwin Dayon, 25 nga pulos lumad nga taga barangay Kahumayan sa dakbayan sa Danao.

Si PO3 Sigfred Perales sa kapolisan sa maong lungsod nga nahinabi sa Banat News miingon nga ang mga suspetsado nadakpan gyud sa akto nga nanguryente og isda   sa suba sa Ipil.

Nasayran nga wala makalihok ang tulo dihang kalit lang miabot sila si SPO1 Gil Javonro ug PO3 Rolin Pescalia aron sa pagsikop kanila.

 Nasakmit sa kapolisan nga mga ebidensiya mao ang 12 volt nga battery, daynamo, ug duha ka mga poste nga gibutangan og mga electrical wiring.

Si PO3 Perales miingon nga ang poste nga adunay gikutay nga buhing kuryente maoy ituslob sa dagat ug kutob sa isda nga makuryentihan , mamatay kini .

Busa ang mga molupyo sa maong lugar mitaho dayon ngadto sa buhatan sa kapolisan sa lungsod.

Hinuon ang tulo ka mga dinakpan gipagawas lamang usab sa detention cell human sila makabayad og multa sa kalapasan nga nabuhat nila. (BANAT)