Gikulata napasok sa PUJ grabe

CEBU, Philippines - Kritikal ang kahimtang sulod sa tambalanan sa usa ka lalaki nga napasok ilawom sa jeepney human kini mikaratil og dagan sa dihang gitabangan og kulata sa dili mominus lima ka mga lalaki kagahapon sa alas-5 sa buntag diha sa atubangan sa dakong mall nga nahimutang sa Colon Area.

Ang biktima nga hangtud karun wala pa mailhi nagsul-ob lamang og itom nga t-shirt, checkered nga purontong nga shorts ug gibana-banang nagpangidaron 20 ngadto sa 30-anyos ug kritikal ang kahimtang sa Cebu City Medical Center (CCMC).

Hinuon usa sa lima nga mikulata sa biktima nadakpan sa mga pulis nga sakop sa Task Force Colon ug giilang si Doly De Gracia nga taga barangay Captain Claudio sa dakbayan sa Toledo apan kasamtangang nagpuyo diha sa M.C Briones sa barangay San Nicolas. Si PO2 Edgardo Becoy, imbestigador sa Traffic Division nga na-interbyu sa DyHP miila sa drayber sa 21B nga jeepney nga si Valerio Nieves, 34, diin mapasok ang biktima.

Si Nieves miingon nga mao pay paglabang niini sa Colon dihang kalit nga mipaka ang iyang sakyanan hinungdan nga kalit niyang gitumban ang brake.

Sa iyang pagsusi sa ilawom nakit-an niya nga nagluko na sa ilawom ang wala mailhing biktima.

Si PO1 Ruben Catubig ug mga kauban nga naka-detail sa Task Force Colon mitug-an nga ilaha gyung nakita nga gitabangan og kulata ang biktima sa lima ka lalaki maong nagpataka og dagan ang biktima.

Tungod niini ilang gigukod ang lima ka lalaki apan si De Gracia ra maoy ilang nadakpan. Matud pa pagkasayod ni De Gracia nga napasok ang biktima sa jeepney milugnot ug mikaratil kini’g dagan hinungdan nga nahitabo na pud ang ilang ginukdanay hangtud nga ilaha usab kining nadakpan.

Si De Gracia sa iyang bahin nga na-interbyu sa DyHP mihimakak sa pasangil nga apil siya sa upat niya ka mga kaubang mikulata sa biktima. - Rey Pasaporte (BANATNEWS)