Suka-kalibang gibantayan

CEBU, Philippines - Nunot sa nahitabong outbreak sa sakit nga suka-kalibang sa dakbayan sa Danao nga mikalas na og tulo ka bata sa milabay’ng duha ka adlaw, si Cebu City assistant epidemiologist Durinda Macasucol miingon nga higpit ang ilang kampanya batok sa sakit nga diarrhea.

Gipasalig niyang “under control” ang sakit nga diarrhea sa siyudad sa Sugbo ug sa talaan sa Cebu City Epidemiology Statistics and Surveillance Unit, miabot ngadto sa 2,070 ang kaso sa diarrhea sa siyudad gikan sa Enero hangtud sa Nobiyembre karong tuiga ug lima ang nangamatay.

Matud pa niya nga kanunay karon ang pagsuroy-suroy sa ilang mga tawo sa nagkadaiyang barangay alang sa kampanya batok sa maong sakit.

Nakigtambayayong nila sa maong programa, ang mga Barangay Health Workers nga nangunay mismo sa pagsuroy sa mga sitio.

Moabot usab ngadto sa 50 ka mga sanitary inspectors sa siyudad ang nangunay pagsusi sa mga kan-anan ilabi na sa ilang mga sanitary permits nga mopamatuod nga luwas ang ilang mga gipangbaligya.

Giawhag usab ni Macasucol ang publiko nga kinahanglan nga manigurong luwas ang tubig nga ilang imnon aron malikay sa diarrhea. ‘Kung magduda gyud sila sa tubig, mas maayo nga ila kini nga pabukalan. Puwede usab sila nga mangayo og chlorine sa mga health centers,” nagkanayon si Macasucol.

Kahinumduman nga tulo ka mga bata ang namatay sa pagsuka-kalibang sa dakbayan sa Danao sa miaging adlaw.

Nasuta nga sa dakbayan sa Danao sobra na sa 210 ka pasyente ang nadala sa Danao District Hospital tungod sa maong sakit maong nagkulang na ang beddings sa ilang tambalanan.

Gisugyot na sa Regional Epidemiology Surveillance Unit ang pag-usab sa mga linya sa tubo, pagmentinar sa kalimpyo ug uban pa human magdudang posibleng sa tinubdan sa ilang water system ang kagaw nga nainom sa mga biktima. - Sanden J. Anadia (BANATNEWS)