Priso miparok sa ulo

Padayong gi-obserbahan sa mga doktor sa Cebu City Medical Center ang usa ka piniriso sa detention cell sa Carbon Police Station nga giingong misuway sa paghikog pinaagi sa pagparok sa iyang ulo sa semento sa miaging gabii ug nadiskubrehan usab nga adunay dagom nga gilubong sa bukton niini.

Tulo ka jailers nag-atubang na karun og imbestigasyon samtang laing upat usab ka polis ang gipatubag sa City Intelligence Branch (CIB) ug Investigation and Detective Management Branch (IDMB) sa Cebu City Police Office subay sa kamanduan ni Sr. Supt. Melvin Ramon Buenafe.

Si Chief Insp. Romeo Santander, hepe sa CIB nga nahinabi sa mga tigbalita miila sa misuway og hikog nga si Paulio Luardo Dibdib walay klarong address ug nag-atubang og kasong pagpanglugos.

Matud ni Santander nga base sa pangangkon sa mga polis giparok ni Dibdib ang ulo ngadto sa semento sulod sa detention cell ug uwahi nang namatikdan sa usa sa mga jailers nga daghan nang nagbanaw nga dugo gikan sa ulo niini hinungdan nga gidali nila og dala sa CCMC.

Sa dihang gi-eksamin sa mga doktor nasuta nga dihay gilubong nga dagom sa panahi diha sa tuong bukton niini.

Gikatakdang imbestigahon sila si SPO4 Eugenio Teves, PO3 Reynaldo Labating ug PO2 Elebert Juaneza kinsa maoy jailers niadtong higayona.

Matud ni Santander nga mag-atubang og kasong infidelity in the custody of the prisoner ug negligence of duty ang tulo nga dunay labing bug-at nga silot nga pagkatangtang sa serbisyo.

“Kinahanglan tan-awon pud ang welfare sa mga piniriso kay tulobagon na sa jailer, way nakakita nga jailer sa midalaw nga nagdala og dagom sa panahi,” matud pang Santander samtang gisusi usab kun giunsa pagkahitabo nga gituslok og dagom ang priso nga wala mahibaw-i sa mga polis.

Matud pang Santander alang sa seguridad sa tanan, tanang moduaw sa bilanggo kinahanglang rekisahon ug daghang gidili nga madala sa karsel.

Matud ni Santander nga ilaha usab patubagon ang hepe sa Carbon nga si Sr. Insp. Pablito Sarno tungod sa command responsibility.

Si Dibdib gipasanginlang nanglugos og usa ka 23- anyos nga dalaga nga taga barangay Tubod, Minglanilla niadtong milabay’ng semana ug nadakpan sa hot pursuit operation diha sa Warwick sa barangay Ermita niadtong Domingo.

Apan base sa nakuhang progress report ug sa resulta sa eksaminasyon sa biktima diha sa Vicente Sotto Memorial Medical Center nasuta nga negatibo sa timailhan nga adunay nahitabong ‘sexual intercourse’ tali sa reklamante ug sa suspek.

“Hopeless na siya (Dibdib) mao nga mi-attempt siya og suicide, siguro ulahi na ang tanan,” nagkanayon si Santander. (BANATNEWS)