Cong. PJ Garcia kasohan ni Saavedra

CEBU, Philippines - Nagplano na usab karon ang whistle blower nga si Crisologo Saavedra nga mopasaka og kaso sa hawanan sa kongreso batok kang 3rd district Congressman Pablo John Garcia igsoon ni Gov. Gwen Garcia tungod sa pagpanghulga niini kang Assistant Ombudsman Visayas Director Virginia Palanca Santiago nga ikiha human niya kini pasanginli nga maoy nagpublikar sa resulta sa fact finding investigation sa kontrobesyal nga pagpalit sa Kapitolyo sa Balili property.

Gibutyag ni Saavedra atol sa interview sa Bantay Radyo nga gitun-an niya karon ang pagsang-at og pormal nga reklamo batok kang Kongresista Garcia sa House Ethics Committee human ihulagway niya nga obstruction of justice ang gihimo sa kongresista.

Kini human magtuo si Saavedra nga taktika kini ni Kongresista Garcia nga mopasaka og kaso kang director Santiago aron mahunong ang imbistigasiyon sa Balili property.

Nasayran nga gituki na og maayo karon sa Ombudsman ang   kwestyonabling pagpalit sa Kapitolyo pinaagi ni Gobernador Garcia sa Balili property didto sa Tinaan, Naga sa kantidad nga kaping P98 milyones bisan kun kapin sa katunga niini naglubog sa tubig dagat.

Si Kongresista Garcia una nang mipadayag nga kalapasan sa rules of procedure of the Anti Graft office ang gihimong pagpublikar sa media sa resulta sa fact finding investigation nga maoy gihimo niining basihanan sa planong pagpasaka og kaso batok sa director.

Apan gitubag kini ni Saavedra nga mas angay mopatigbabaw ang public interest sa kontrobersyal nga pagpalit sa Balili property diin gidugang ni Saavedra nga sa iyang nahipos nga impormasiyon P65 milyones lang ang nadawat sa pamilyang Balili ug kapin sa P30 milyones niini ang nahipunta sa komisyon sa taga Kapitolyo basi sa mga ebedensiya nga iyang nahipos. (BANATNEWS)