PNP sa Cebu andam na sa Pasko

CEBU, Philippines - Andam na ang kapolisan alang sa umaabot nga Pasko dinhi sa dakbayan ug Metro Cebu.

Si PRO-7 Chief Supt. Ager Ontog Jr. nga nahinabi sa mga tigbalita mitug-an nga ang Kampo Crame miluwat og kamandoan sa tanang direktor sa kapolisan sa tanang rehiyon sa tibuok nasud nga sugod karong Disyembre 15 kansilahon na ang Leave of Absence sa tanang polis hangtod sa pagsugat sa Bag-ong Tuig.

Tumong niini mao nga ang tanang kapolisan present atol sa pagsaulog sa Pasko ug pagsugat sa Bag-ong tuig.

Matud ni Ontog nga ilang gipangandaman og maayo nga walay mabiktima sa mga kriminal gikan sa laing lugar nga moanhi sa dakbayan sa panahon sa Pasko ug Bag-ong Tuig.

Gani mitataw si Ontog nga lakip sa ilang preparasyon atol sa Pasko ug Bag-ong Tuig mao ang pagpakatap og daghang personnel sa kadalanan ilabina kadtong tapokanan sa daghang mga tawo, sama sa mall, simbahan, tourist spot ug pantalan aron masigurong malinawon ug walay mabiktima nga mga inosenteng sibilyan.

Sa iyang bahin si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga daghang personnel ang iyang ipakatap sa kadalanan karon nga pormal nang gibuksan sa miaging gabii ang “Kasadya sa Colon”. (BANATNEWS)