CEBU, Philippines - Mopatawag si Cebu City Mayor Michael Rama og tigom sa mga opisyales sa siyudad ug ingon man pribadong sektor alang sa pagtuki sa problema sa dumpsite sa siyudad.
Naglaraw si Rama nga ilawom sa iyang pamunoan makatukod na ang dakbayan og bag-ong landfill tungod sa reklamo sa Department of Public Services (DPS) nga puno na ang Inayawan Sanitary Landfill.
Si Rama nagkanayon nga kinahanglang pangitaan kini og solusyon pinaagi sa pagpatuman sa Republic Act 9003 nga giila usab sa tawag nga Ecological Solid Waste Management Act sa tuig 2000.
“Ato nang ipangutana kung unsa ilang report kay kinahanglan na gyud ni nga lihukon, dili lang ta pulos estorya, tubagon gyud ning problemaha dili kay ato lang ning piyong-piyongan,” matud pa ni Rama. Usa sa gitahasan sa mayor sa pagpangita og solusyon si Konsehal Eduardo Rama kabahin sa nahauna nang giplanuhang himuong dumpsite diha sa barangay Kalunasan.
Ang konsehal gitugyanan sa kanhi mayor karon kongresista nga si Tomas Osmeña sa pag-inspeksyon sa yuta nga posibleng himoong sanitary landfill sa maong barangay.
Sa panahon sa paglingkod ni Osmeña, gikonsiderar niini ang 15 hectares nga landfill site sa Kalunasan. Gibutyag ni konsehal Rama nga sa ilahang inisyal nga inspeksyon sa maong lote, nahibaw-an nila nga gipanag-iya kini og daghang pribadong indibidwal.
“Dili gyud madali kay daghan ang tag-iya sa luna pero haom gyud kaayo nga tukoran og landfill,” sigon pa sa konsehal ug miingon nga sa sunod bulan pa niya ihatag ang report sa mayor. (BANATNEWS)