German nakit-ang naglutaw sa lapu'

CEBU, Philippines - Napalgang naglutaw sa dagat ug wala nay kinabuhi ang usa ka German national daplin sa baybayon sa sitio New Paradise sa barangay Pajo, dakbayan sa Lapulapu alas-6 pasado ang takna sa Lunes sa buntag.

Ang namatay giila pinaagi sa nakuhang passport sa iyang pitaka nga siya mao si Alfred Hugo Wolfgang, 52, apan wala pa masayri kun diin kini magpuyo karon sa Sugbu.

Si PO3 Dioscoro Arong sa homicide section nga nahinabi sa Banat News miingon nga usa ka Yoly Ybañez nga molupyo sa maong dapit maoy unang nakakaplag sa patay’ng lawas sa maong langyaw.

Ang maong langyaw nga napalgan ang nagsul-ob pa sa polo nga taas og bukton, maong nga karsones ug mahalon nga relo de pulso niini. Sa unang pakisusi sa kalawasan sa maong langyaw wala sila makakita og mga timailhan nga kini gibinuangan nga maoy hinungdan sa iyang kamatayon.

Gitataw ni Arong nga daghang posibilidad sa hitabo ang gisusi sa kapolisan nga maoy nakaingon sa kamatayon ni Hugo. Usa sa ilang gidudahan mao ang posibilidad nga natagak kini gikan sa barko o nahagbong gikan sa bridge ug naanod na lamang kini sa maong dapit. (BANATNEWS)