'Gun for hire' nadakpan, armas nasakmit

CEBU, Philippines - Nasikop ang usa ka habal-habal drayber nga gipasanginlang usa ka gun-for hire nga dunay daghang kasong giatubang sa korte niadtong Sabado sa alas-10 pasado sa buntag samtang kini namasahero diha sa Sudlon Uno dakbayan sa Sugbu.

Ang nakasikop sa suspetsado mao sila si PO2 Elvir Mabatid, PO2 Eutique Prosia ug PO2 Nathaniel Lumacad sa Cebu City Public Safety Company (CCPSC) kanhi nabungkag nga Vice Squad sa Cebu City Police Office pinasikad sa warrant of arrest sa kasong Murder ug Attempted Murder nga giluwatan niadto lang Nobiyembre 19 ni Judge Wilfredo Navarro sa Branch 19 sa Regional Trial Court sa Cebu City.

Si Dindo Nadera, 31, taga sitio Morga barangay Sudlon Uno nadakpan sa kapulisan ug nakuhaan og usa ka .9mm pistol nga adunay magazine ug pito ka buhing bala.

Matud ni Sr. Insp. Pablo Cabildo, hepe sa CCPSC nga nahinabi sa mga tigbalita nga nakadawat sila og kopya sa warrant of arrest ni Nadera ug ila dayon kining gipanid-an ug niadtong Sabado   dihang ilang nakit-an nga namasahero og habal-habal diha sa sitio Consit sa samang barangay ilaha kining gisikop.

Matud ni Cabildo nga ilaha karung susihon ang report nga si Nadera maoy nibanhig sa usa ka polis kaniadto ug ingon man ang pagbanhig patay sa usa ka tanod diha sa Sudlon ug ang report nga nalambigit kini sa gun for hire.

Si Nadera nga nahinabi sa mga tigbalita mihimakak sa mga pasangil samtang gihimakak niyang iyaha ang maong armas kundili gihatag ra kini sa ginganlan og Auring nga taga Sudlon Uno human siya gisugo nga ipapatay kaniya ang usa ka kagawad sa nahisgutang lugar nga si Francing Belleta tungod sa panagbangi sa yuta.

Matud niya nga gitanyagan siya ni Auring kinsa anaa karun sa dakbayan sa Lapulapu og P50 mil aron patyon ang maong kagawad apan iya kining gibalibaran.  (BANATNEWS)