Ulitawo gibukton pagdunggab

CEBU, Philippines - Samaron sa bukton ang usa ka ulitawo kinsa gidunggab sa wala hiilhing kriminal didto sa merkado publiko sa barangay Tabunok, dakbayan sa Talisay sa miaging kaadlawon.

Ang biktima nailhan nga si Leonardo Juarez, 31, nga taga sitio Mananga 1, barangay Tabunok.

Sumala sa kapolisan sa Talisay nga naglakaw lang ang biktima sa karsada   padulong sa merkado sa Tabunok dihang kalit siyang gisugat sa wala hiilhing tawo ug giluba.

Maayo nalang kay nasapi niya ang kutsilyo busa ang tuong bukton ra niya maoy nasabak niini.

Daling gihatod ang biktima ngadto sa Talisay District   Hospital, samtang padayon pang gipangita sa kapolisan ang kriminal. (BANATNEWS)