Nangihi gipusil patay

CEBU, Philippines - Nakabsan sa kinabuhi ang usa ka 38 anyos nga lalaki human iloka pagpusil sa iyang gikabanging silingan didto sa dalan Juan Luna, barangay Looc, dakbayan sa Danao kagahapon sa alas 4:20 sa kaadlawon.

Ang biktima nailhan nga si Keith Gonzales Alfajora, 38, minyo nga taga Looc, samtang ang suspetsado   mao usab si Ramil Bariga, hingkod nga silingan ra sa biiktima.

Si PO2 Marlon Remullo sa Danao City Police Station mibutyag sa Banat News nga ang biktima naglakaw sa dalan ug pag-abot niini sa maong lugar, gumikan kay kaihion, mipadaplin kini sa karsada ug nangihi.

Apan matud pa ni Remullo nga kalit lang miduol ang suspetsado ug sa walay daghang estorya, gitirohan dayon sa iyang armas de fuego nga wala hisayring kalibre ang walang ilok sa biktima.

Dihang natumba sa yuta ang biktima, milakaw lang usab dayon ang suspetsado pahilayo sa maong lugar.

Nianang hayag na ang kabuntagon ang mga molupyo na sa maong lugar maoy nakakita sa lawas sa biktima nga wala nay kinabuhi.

May pamahayag ang mga nakaila sa maong biktima ngadto sa kapolisan nga matud pa ang biktima ug suspetsado dugay nang nagkabangi gumikan kay wala magkasinabtanay sa ilang pagpamaligya og ginadiling drugas.

Padayon pang gipangita sa kapolisan ang suspetsado. (BANATNEWS)