2 ka drayber gipusil sa amahan ug anak

CEBU, Philippines - Duha ka mga taxi drayber ang nalandig sa tambalanan human kini gipamusil sa amahan ug anak samtang nag-inom-inom sa miaging alas-3 sa kahaponon diha sa A. Lopez sa barangay Labangon dakbayan sa Sugbu.

Ang mga biktima mao sila si Isagani Sinag, 37, ug Dianos Desoyo, 42, pulos taxi drayber ug managsilingan nga nagpuyo sa nahisgutang lugar.

Nadakpan hinuon sa follow-up operation sa kapulisan ang mga suspek nga sila si Renato Ruyo, 43, ug anak nga si Jason, 20, kinsa nakuhaan og snubnose nga .38 revolver nga dunay kabhang ug buhing mga bala.

Sigun sa report sa kapulisan nga gibadlong sa mga biktima si Jason human dudahing manghilabot diha sa ilang dapit apan nasuko kini ug mikuha’g armas ug namusil.

Si Sinag nakaangkon og samad pinusilan sa walang bahin ubos sa ilok, samtang natapsingan sa ulo si Desoyo ug ang bala nilahos sa iyang wala nga abaga hinungdan nga gidali sila pagdala sa tambalanan.

Ang suspek nga amahan ug anak nangabun-og sab human kini gitabangan og kulata sa mga estambay sa wala pa kini nadakpan sa kapulisan.

Si PO1 Nilo Aventurado sa Homicide Section nga nahinabi sa Banat News sa telepono nagkanayon nga unang nadakpan ang anak human kini kulataha sa mga tawo.

Dugang pakisusi sa kapulisan nga ang amahan maoy nakapusil sa usa sa mga biktima apan wala na makuha nila ang armas nga gigamit niini. (BANATNEWS)