CEBU, Philippines - Kusganong gisupak ni Congressman Luigi Quisumbing sa ika-unom nga distrito sa lalawigan sa Sugbo ang laraw sa Aquino Administration sa pag-privatize sa National Food Authority (NFA) nga maoy usa sa nalakip sa Private-Government Partnership program nga gihingusgan ni Presidente Noynoy Aquino.
Sa sayo pa ang presidente sa Grain Retailers Confederation (GRECON) ug mayor Nini Aligado sa lungsod sa Consolacion, mitug-an sa interview sa DyRF nga ang pangulo karon sa NFA nga si Lito Banayo may tinguha sa pag-rekomendar ngadto kang Presidente Aquino nga i-privatized ang pagdumala sa NFA.
Kini aron sigurado nga kapugngan ang shortage sa supply sa bugas dinhi sa Pilipinas.
Matud pa ni Aligado nga may nagsulti kaniya nga si Banayo nakigkonsabo sa mga negosyante og bugas didto sa Manila nga suod sa bana sa igsoon ni Presidente Aquino aron makapundo og dakong kwarta ug kalit lamang unyang mobiya sa iyang katungdanan.
Si Quisumbing nga nainterview usab sa DyRF mitumbok nga usa kini ka dakong suliran sa nasud nga atubangon unya sa administrasyong Aquino sanglit importante kaayo ang food security sa nasud.
Iyang gitataw nga ang NFA maoy nag-unang ahensiya sa kagamhanang national nga makahatag og kasiguroan sa baratong presyo sa bugas alang sa mga Filipino sa umaabot nga tuig. Kini aron dili na masubli pa ang nahitabong rice shortage sa tibuok nasud sa milabay’ng administrasyon ni kanhi presidente Gloria Macapagal Arroyo.
Giklaro ni Quisumbing nga kun i-privatize ang NFA kinahanglang masayran kun kinsay magkontrol niini ug nga makahatag kini og kaayohan sa tanang benepisyaryo makabinipisyo nga mao ang mga kabos nga mga Filipino. (BANATNEWS)