CEBU, Philippines - Gipadayag ni Konsehal Alvin Dizon nga makahatag og mansa sa turismo sa siyudad ang nagkagrabe karon kadaghang makililimos sa kadalanan.
Nagkanayon si Dizon nga maong makilimos naggikan sa probinsiya ug kasagaran moanhi dinhi sa siyudad panahon sa buwan sa Disyembre.
Sumala pa niya nga gawas sa dakbayan sa Sugbo, kinahanglan usab nga motambayayong ang uban nga mga local government unit .
“Na-una gyud nga problema sa nasud ang poverty, busa kinahanglan nga ang national government mohimo og pang-long term nga project,” nagkanayon si Dizon.
Bisan pa man niini, gipadayag ni Dizon nga nagpadayon gihapon ang siyudad sa pagpatuman sa Anti-mendicancy ordinance aron masumpo ang mga makililimos sa kadalanan.
“Dili gyud angay tagaan og kuwarta ang makililimos. Pero dili man gud malikayan nga adunay manggiluy-on nga mga tawo, mas maayo nga pagkaon na lang ang ilang ihatag,” matud pa ni Dizon.
Una nga mipasidaan ngadto sa publiko ang chairperson sa Cebu City Anti Mendicancy Task Force (CCAMTF) nga si Isabela Ganub nga dili mohatag og limos sa mga makililimos sa kadalanan aron dili kini mogara.
Matud pa ni Ganub nga kinahanglan nga motuman ang mga tawo sa City Ordinance 1631 nga nagdili sa paghatag og kuwarta ngadto sa makililimos aron dili sila makamulta og P1,000. (BANATNEWS)