Suspetsadong drug pusher natiklo
CEBU, Philippines - Usa ka suspetsadong pusher og shabu nadakpan sa hiniusang team sa kapolisan sa Talisay ug sa Philippine Drug Enforcement Agency (PDEA)-7 didto sa Zone 5, Central Biasong, dakbayan sa Talisay sa miaging buntag.
Ang suspetsado giila nga mao si Luis Inso Jr., 48, minyo, nga taga Biasong.
Si PO1 Euwen Pitogo mibutyag sa Banat News nga ang pagkasikop sa maong suspetsado nahimo human sa duha ka semana nilang paniid sa mga kalihukan niini.
Pinaagi sa search warrant nga giluwatan ni RTC Judge Soliver Peras dali ra kaayo nilang nasikop ang suspetsado.
Ang mga polis nga misikop niini gipangulohan ni ni PO3 Rey Bucao, PO3 Benedicto Lasque, PO2 Roy Lofranco ug PO1 Euwen Pitogo ug uban usab sa taga PDEA7.
Matud pa ni Pitogo nga wala mosukol sa kapolisan ang suspetsado ug malinawon kining mitahan sa iyang kaugalinghon ngadto sa mga otoridad.
Nakuha gikan sa suspetsado ang duha ka medium nga pakiteng shabu, duha ka syringe, pito ka gilukot nga tinfoil, 1 ka tissue wick o pabilo, 2 ka wala nay sulod nga nubain ampule, usa ka improvised burner, usa ka kandila ug usa ka kahon.
Si Inso kasamtangang gibalhog sa Talisay City Jail. (BANATNEWS)
- Latest
- Trending
