P730 million jackpot prize way kadaog

CEBU, Philippines - Mitamak na sa kapin sa P730 milyones ang jackpot prize sa 6/55 Grand Lotto human wala gihapoy nakadaog sa nakalabay’ng adlaw’ng Sabado nga draw. Sumala pa ni Philippine Charity Sweepstakes Office (PCSO) operations manager Arnel Cases nga ang projected prize alang sa draw karong gabii mosobra sa P 730 million tungod kay magdepende ra kini sa ticket sales karong adlawa.

Nasayran nga niadto pang Sabado aduna nay nanigurong makapalit sa ilang paboritong mga numero sa panigurong dili sila magkara-kara karong adlawa.

Si Margie Juico, PCSO chairman mibutyag ngadto sa igsuong pamantalaan sa Banat News nga The Philippine Star nga ang PCSO board nagdiskusyon na sa posibilidad nga himuong installment basis ang paghatag sa premyo ngadto sa swertihong makadaog tungod sa kadako sa nalambigit nga premyo.

“We are concern that the winner may not be able to winning,” matud pa niini.

Hinuon dali niyang giklaro nga ang installment basis nga paghatag sa premyo sugyot pa lamang ug dili prayoridad sa PCSO apan kini miingon nga posibleng matuki kini unya atol sa gihikay sa Kongreso nga pagpasar og resolusyong limitahan ang jackpot prize sa lotto ngadto lamang sa P 500 milyones.

Matud pa niini nga ang bisan unsang kausaban sa paghatag sa premyo kinahanglang mag-agi pa og konsultasyon ilabi na sa publiko nga maoy nag-unang stakeholder sa maong sugal. (BANATNEWS)