Drainage sa Talisay atimanon na

CEBU, Philippines - Ang pag-implementar sa Comprehensive Master Drainage Plan maoy usa sa unang proyekto nga tutokan sa dakbayan sa Talisay sa sunod tuig.

Si Konsehal Rodolfo Cabigas kinsa maoy chairman sa Appropriation, Budget, Management and Ways and Means mibutyag sa Banat News kagahapon nga gihuwat na lang nila nga makasumiter og kompletong dokumento ang consultant nga gi-hire sa siyudad.

Kasagaran sa mga patag nga lugar sa Talisay malubong sa baha panahon sa tinguwan tungod kay ang siyudad walay hustong drainage system.

Adunay mga dapit nga mohubas dayon ang baha apan aduna say dugay kaayong mahubsan ug molanat pa og nga pipila ka buwan una maoga ug delikadong maitlogan sa mga lamok nga dengue.

Kasagaran sa mga residente sa Talisay nagbagolbol na ug nanghinaut nga kahatagan na og kasulbaran ang problema kabahin sa drainage system sa siyudad.

Ikaduhang proyekto nga ubos sa inprastraktura nga tutokan sa siyudad sa sunod tuig mao ang pagtukod sa circumferential road sa market-cum-terminal sa barangay Lagtang aron mabalhin na sa maong lugar ang nahisgutang merkado ang mga vendor nga gikan sa merkado sa Tabunok.

Ang ikatulong proyekto mao ang pagtukod sa lane-separator diha sa barangay Lawaan I.

Sa laing bahin, gawas sa maong mga proyekto matud ni Cabigas nga naghuwat usab siya sa request ni Chief Inspector Renante Rubio, Jail Warden sa Talisay City Jail kinsa nangindahay nga mahatagan og budget sa siyudad ang iyang proyektong pagpatukod og playground sa city jail aron maaghat sa pagduaw ang mga anak sa piniriso kay aduna sila’y kaduwaduwaan.

Sayo niini si Rubio mibutyag nga sa milabay’ng duha ka buwan gipadangat na niya ngadto sa buhatan sa mayor ang iyang request kabahin sa nahisgutang proyekto ug nanghinaot siyang magahinan kini og salapi sa siyudad. (BANATNEWS)