Mitulis ug mipatay sa mahuyang dakpan

CEBU, Philippines - Nadakpan dayon kagahapon sa kapolisan sa Mandaue ang mitulis ug mipusil patay sa usa ka mahuyang didto sa U.N. Avenue sa barangay Alang-Alang, dakbayan sa Mandaue niadtong Sabado sa kaadlawon.

Ang nagtingkagol na karon sa prisohan sa kapolisan sa maong dakbayan mao si Dayn Michael Cuizon, hingkod nga taga Hilltop sa barangay Casili, lungsod sa Consolacion.

Ang nakasikop sa maong suspetsado mao ang mga sakop sa Investigation Detection and Management Bureau (IDMB) sa Mandaue City Police Office (MCPO) sa hot pursuit operation nga gilusad nila niadtong Sabado sa gabii.

Si PO3 Dionesio dela Pena sa (IDMB) miingon nga si Inspector Ramil Morpos nga maoy ilang hepe sa ilang buhatan maoy nakadakop sa suspetsado didto sa panimalay niini .

Matud pa ni PO3 Dela Pena nga positibo nga giila sa pipila ka mga nakasaksi sa maong suspetsado dihang gipusil, patay niini si Noel Giganto nga taga Pusok, dakbayan sa Lapulapu ug kawani sa Timex Philippines sa MEPZ sa dakbayan sa Lapulapu.

Si Dela Pena miingon nga nailhan si Cuizon sa mga traysikad sa maong lugar nga usa sa tulo ka mga lalaki nga nagsakay og motorsiklo nga maoy milabni sa shoulder bag sa biktima sa wala pa kini pusila.

Gumikan kay ang biktima nagdumili sa paghatag sa iyang shoulder bag misinggit kini sa pagpangayog panabang nga maoy hinungdan nga gipusil ang iyang ulo ug namatay.

Dugang pa niya nga ang duha ka mga kauban ni Cuizon sa maong pagpanulis ang nakuha na usab nila ang mga pangalan apan pabilin pa kining gawasnon niining panahona. (BANATNEWS)