3 Manag-agaw nalumos

CEBU, Philippines - Tulo ka batang manag-agaw ang nangamatay human giingong nalumos samtang nanapyaw og isda sa Abayan River sa barangay Gen. Climaco (kanhi barangay Malubog) sa bukirang bahin sa syudad sa Toledo pasado alas-8 sa miaging buntag.

Ang mga biktima mao sila si Jonathan Egloria, 16, Jerick Egloria Camos, 15, Ronnie Egloria Montomo, 13,pulos first degree cousins nga residente sa sitio Arpewe sa maong barangay.

Base sa inisyal nga imbestigasyon sa kapolisan nasayran nga ang tulo ka biktima nagkalingaw og panapyaw og isda sa nahisgutang suba dihang nahitabo ang aksidente.

Ang tulo ka manag-agaw giingong napunta didto sa gibana-banang tulo ngadto sa upat ka dupa nga bahin sa maong suba ug tungod kay dili makamaong molangoy nalumos ang tulo.

Sa pakighinabi sa Banat News ni SPO3 Carmelito Arnales mibutyag kini nga posibling tungod sa kakusog sa sulog sa tubig maong gianod ang tulo ngadto sa lawom nga bahin.

Ang mga barangay tanod pinangulohan ni barangay kapitan Antonio Canonigo mao nay nakakuha sa mga biktima diha gihapon sa ilawom sa maong suba.

Si Canonigo nga gikahinabi sa Banat News sa telepono kagahapon miingon nga pipila na ka adlaw ang nakalabay ang habig diin malumos ang mga bata dili lawom ug sayo nianang adlawa sa pagtaak sa mga bata taga pusod (hawak) ra kini bisan 100 metros na ang gilay-on gikan sa tampi.

Apan matud pang Canonigo nga dunay bahin sa maong suba nga likoanan sa sulog sa tubig nga gituohan nilang kaniadto kanal nakankan ug misamot og kalawom tungod sa pagbangga sa tubig.

Sumala pang Canonigo nga ang tulo nagguyod sa tapyaw (ginama sa twine) aron manakop og isda dihang gituohang naabot ang tulo sa nahisgutang lawom nga bahin sa maong sapa.

Ang Abayan River usa sa mga suba nga konektado sa Malubog lake nga adunay dam diha sa maong barangay ug gibana-banang 400 meters lang gikan sa bukana sa maong suba mao na ang Malubog lake.

“Naabot ni sila adtong kimba, unya dili man makamaong molangoy mao tong sitwasyona nga nalumos,” matud pang Canonigo.

Ang duha sa mga biktima nakit-an tulo ka oras gikan sa pagsugod sa search and rescue samtang dangtan pa og usa ka oras nakaplagan usab ang ikatulo nga pulos matud pa diha pa sa ilawom sa suba. Matud pang Canonigo migamit sila og pukot nga gipaguroy diha sa ilawom maong napukotan ang mga patay’ng lawas sa duha (mga pangalan wala na matiman-i sa kapitan) samtang ang ikatulo nakuha nila gibana-bang 20 metros gikan sa dapit diin napukotan ang duha.

Sumala pang Canonigo ang ikatulong biktima nakaw-itan sa gipaguyod nga nylon nga adunay mga taga (bingwit) diha gihapon sa ilawom ug giingong nagkupot pa gihapon sa balding gisudlan sa ilang nakuhang mga isda. (BANATNEWS)