CEBU, Philippines - Usa ka trabahante sa call center napusilan angol didto sa Escario Street sa Barangay Kamputhaw, ning dakbayan sa Sugbo sa miaging gabii.
Ang biktima mao si Jonathan Barbosa Sitoy, 22, usa ka call center agent, lumad nga taga San Enrique, Negros Occidental apan kasamtangang nagpuyo sa Sitio Anagan sa Baranggay Apas ning dakbayan sa Sugbo.
Matud sa kapolisan nga ang biktima sa sayo pa nakig-inom sa iyang duha ka higala sa usa ka tindahan sa dalan Escario.
Apan samtang nagpadayon sila sa pag-inom nakadungog sila og kagubot sa dapit duol sa ilang giimnan, busa mibarog ang biktima uban sa iyang mga higala aron mosil-ing sa kaguliyang.
Unya nakit-an sa mga saksi ang usa ka wala hiilhing lalaki nga may dalang armas nga maoy mipabuto sa makaduha nga higayon.
Nasayran nalang nga ang maong mga buto gitumong ngadto sa biktima tungod kay mireklamo man dayon kini nga namanhod ang iyang walang bukton uban sa miagas nga dugo.
Ang biktima gihatod dayon ngadto sa Chong Hua Hospital samtang padayon pang gipangita sa kapolisan ang nakapusil. (BANAT NEWS)