CEBU, Philippines - Tulo ka managlahing kaso sa pagpanglungkab ang nahitabo sa Sitio Kalubihan, Brgy. Kalunasan niining dakbayan sa Sugbo kagahapon sa kaadlawon.
Ang mga biktima giila nga sila si Danilo Bornales, 53, Cardena Andres, 37, ug si Roberta Rodriguez, 65, pulos minyo, nga pulos taga Kalunasan.
Si Bornales nakawatan og mga alahas nga gibana-banang nagkantidad og P25,000; si Andres nakuhaan og yawe sa multicab ug usa ka paresan sa tsinelas, samtang si Rodriguez nakawatan sa iyahang laptop, relo, cellphone ug mga sinina nga mokabat ang tanan og P60,000.
Nasayran nga ang mga kawatan nakasulod sa matag balay sa mga biktima pinaagi sa pagpangguba sa mga pultahan ug mga bintana niini.
Gumikan kay nahinanok pag-ayo ang mga biktima wala gayud nila mamatikdi ang maong kawatan ug bisan ang mga silingan nila wala usab maka-alinggat sa maong hitabo.
Si PO3 Eddie Miego, PO1 Bradford Lavandero ug PO2 Molben Jimenez sa Guadalupe Police Station nagkanayon nga may dakong kalagmitan nga grupo sa mga kawatan ang miatake sa maong lugar.
Sa pagkakaron ila pang gipanid-an ang maong mga kawatan ug miawhag sa mga tagbalay nga dili gayud magkompiyansa.
Bisan ang mga barangay tanod ila usab nga giawhag nga motabang sa pagbantay sa palibot sa ilang barangay. (BANAT NEWS)