Tungod sa text babaye naghikog

CEBU, Philippines - Gumikan text message usa ka babaye nakabsan sa kinabuhi pinaagi sa paghikog gumikan sa sobrang pangabubho ngadto sa iyang kapuyo didto sa Sitio Sto. Niño, Brgy. Lamac, lungsod sa Consolacion kagahapon pasado alas 5:00 sa kadlawon.

Ang biktima giila nga si Charlyn B. Mondejar, 25, lumad nga taga Brgy. Pagatpatan, Butuan City, ug nagpuyo uban sa iyang live-in partner nga si Joseph Goc-ong, 19.

Sa imbistigasyon sa kapolisan sa maong lungsod nasayran nga sa sayo pa nabasahan ni Mondejar ang text message   sa cell phone ni Goc-ong.

Ang maong mensahe sa text nakapatahap kang Mondejar nga may laing babaye ang iyang kapuyo nga si Goc-ong.

Sumala sa kapolisan sa Consolacion nga may katahap silang gas ang unang giyarok ni Mondejar una kini naghikot og pisi nga nylon sa iyang liog nga gigaid sa sagbayan sa ilang gipuy-ang balay.

Kini tungod kay diha sa tupad ni Mondejar ang usa ka botelya nga may sulod nga gas.

Sigun pa ni SPO1 Berlino Ricafort nga ang inahan ug apohan ni Goc-ong maoy unang nakadiskobre sa patay’ng lawas sa biktima human nila mabantayi nga nagpunay og hilak ang iyang upat pa ka bulan nga anak sulod sa ilang lawak.

Samtang sa laing bahin giangkon usab ni Goc-ong nga nagselos si Mondejar sa text message nga nabasahan niini sa iyang cell phone apan iyang gihimakak nga may lain siyang babaye.

Dugang pa ni SPO1 Ricafort nga padayon nilang gipangita karon ang pamilya ni Mondejar tungod kay wala kini mosulti sa ngalan sa iyang ginikanan ngadto ni Goc-ong. (BANAT NEWS)