Shoulder bag wa ihatag gipatay

CEBU, Philippines - Patay ang usa ka mahuyang nga gituohang misukol sa tulisang nagsakay og motorsiklo human kini gipusil ala-una pasado ang takna sa miaging kaadlawon sa dalan United Nation Avenue sa barangay Alang-Alang, dakbayan sa Mandaue.

Ang biktima mao si Noel Giganto, 27, taga Pusok, dakbayan sa Lapulapu ug kawani sa Timex Philippines sa Mactan Export Processing sa maong dakbayan.

Samtang padayon pang giila sa kapolisan ang tulo ka tulisang nagsakay og motorsiklo nga kalit mihunong sa biktima.

Si PO3 Ramil Lim sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga naglakaw ang biktima sa maong dapit dihang nahitabo ang pagpanulis.

Sumala pa niini nga samtang naglakaw gikuha sa biktima ang iyang cellphone gikan sa iyang shoulder bag ug kalit nga gihunongan sa kolor orange nga motorsiklong giluwanan sa tulo ka lalaki.

Matud pa ni Lim nga gibunlot sa usa sa duha ka nag-angkas nga lalaki ang shoulder bag ni Giganto apan dali kining nakuptan ug napugngan sa biktima dungan sa pagsinggit og pangayo og tabang.

Diha-diha usa sa mga nag-angkas ang kalit lang miibot og armas ug gipusil ang ulo sa biktima makausa ka higayon hinungdan sa pagkahagba niini sa sementadong karsada.

Ang pipila ka mga traysikad nga nakamatikod sa maong hitabo nagdali unta sa pagtabang sa biktima apan ang mga tulisan daling mipabulhot sa ilang motorsiklo padulong sa barangay Paknaan sa maong dakbayan.

Si Lim miingon nga sa ilang pagpakighinabi sa mga igsuon sa biktima nasayran nga magsuroyan kini diha sa maong lugar aron mag-internet.

Dugang pa niya nga ilang gituohan nga padulong na ang biktima mosakay paingon sa dakbayan sa Lapulapu dihang gitulis ug gipatay. (BANAT NEWS)