Kasadya sa Colon karong lunes

CEBU, Philippines - Pormal nga ilusad sa dakbayan sa Sugbo ang tinuig nga selebrasyon nga Kasadya sa Downtown 2010 o Kasadya sa Colon karong umaabot nga Lunes pinaagi sa himuong heritage walk.

Ang unang rota magagikan sa Elizabeth Mall, ang ikaduha sa Plaza Sugbo ug ang ikatulo sa Pahina Central diin mag-abot ning tanan sa dalan Colon.

Ang Kasadya sa Downtown nga naila sa tawag nga ‘night market’ usa sa Downtown Revitalization Project sa siyudad nga nagsugod niadtong tuig 2005 sa tinguha nga buhion og balik ang kasadya sa dalan Colon ug ingon man buhion ang kaagi niini. Kahinumduman nga mihinay ang halin sa mga mamaligyaay tungod sa mga nanulbong nga mga bag-ong malls sa nagkalain-laing lugar sa siyudad.

Sa pakighinabi sa mga tigbalita kang Henry Tomalabcad, kanhi director sa Downtown Revitalization Project mibutyag kini nga mas midaghan karon ang mga stall owners sa Colon.

Matud niya kapin sa 100 kumpara sa una nga 80 kapin ang naninda sa Colon. Dugang pa niya nga ang mga baligya sa night market mas barato ug mas daghan kay giangkat kini gikan sa Mindanao, Manila, Taiwan ug China. Awhag pa ni Mayor Michael Rama sa katawhan nga suportahan nila ang Kasadya sa Downtown.

Magsugod ang kasadya karong Disyembre 1 hangtod 30 diha sa barangay Sto. Niño, Kamagayan, Kalubihan ug Pari-an ug niining mga adlawa sirad-an sa trapiko ang dalan Colon sugod alas-6 sa gabii hangtud na sa alas-2 sa kaadlawon. – BANAT NEWS