Negosyante'g karne gidepensahan

CEBU, Philippines - Gipanalipdan sa kagamhanan sa dakbayan sa Mandaue ang mga lokal nga negosyante og karne batok sa mga imported nga nahimo na nilang kompetensiya pinaagi sa pagkolekta og dugang buhis.

Kini subay sa giaprobahang resolusyon sa regular session sa konseho nga nagpahamtang og dugang buhis alang sa imported nga mga karne sumala pa sa resolusyon ni Konsehal Jimmy Lumapas.

Samtang subay niini gipaubsan usab sa maong ordinansa ang balayranan sa matag hayop gikan sa lokal nga supplier isip gate fee nga maoy gikolekta sa kagamhanan.

Ang matag usa ka hayopan nga ibaligya sa merkado publiko sa dakbayan ang gikolektahan sa kagamhanan og P30 isip dugang buhis nga gikolekta niini. Sa nasayran nga ubos sa bag-ong ordinansa P15 nalang sa matag usa ka buok hayop ang bayran matag ipasulod sa merkado publiko sa dakbayan.

Kini usa ka dakong sukwahi sa mga imported nga karne sa hayopan nga ang mga negosyante kolektahan og dugang buhis nga ilang balayranan ngadto sa kagamhanan.  – BANAT NEWS