Whistleblower gustong ipasuspenso si Gwen

CEBU, Philippines - Pormal na nga giduso sa whistleblower nga si Crisologo Saavedra sa buhatan sa Ombudsman-Visayas ang iyang hangyo sa pagpasuspenso kang Gob. Gwendolyn Garcia bali og unom ka buwan.

Kini samtang ipahigayun sa maong buhatan ang pormal nga imbestigasyon sa kaso may kalabutan sa giingong anomalosong pagpalit sa Kapitolyo sa luna sa mga Balili sa lungsod sa Naga balor og P99 milyones. Matud pa ni Saavedra nga mahimo nga mahilabtan ni Garcia ang mga dokumento nga gikinahanglan sa kaso kung magpabilin siya sa gahum samtang magpadayun ang imbestigasyon.

Apan ang tigpamaba ni Garcia nga si Atty. Rory Jon Sepulveda miingon nga pre-mature kaayo ang gihimo ni Saavedra sanglit hangtud karon wala pa’y kaso nga gipasaka batok sa gobernador.

Matud pa ni Sepulveda nga pangitaon pa sa Ombudsman ang reklamante sa kaso aron moluwat og mga pinanumpaang pamahayag nga gamiton sa imbestigasyon.

Si Saavedra miangkon nga siya ang reklamante sa kaso apan si Sepulveda dili motuo kaniya sanglit ang Ombudsman nagkanayun nga ang ilang imbestigasyon gibase sa anonymous letter. Wala malakip sa ipasuspenso ni Saavedra si Bise-Gob. Gregorio Sanchez, Jr. ug ubang opisyal nga nalambigit sa kaso.  – BANAT NEWS