34 sundawo gidisarmahan

CEBU, Philippines - Kapin sa 30 ka mga sakop sa 19th Infantry Battalion nga nalambigit sa engkwentro sa barangay Lim-ao sa lungsod sa Kananga, Leyte nga mikalas og tulo ka sibilyang sakop sa Energy Development Corporation nga giingong biktima sa crossfire.

Si Major Christopher Tampus ang tigpamaba sa Central Command atol sa pakighinabi niini sa mga tigbalita nagkanayon nga gipadisarmahan ang 34 ka sundalong sakop sa 19th IB samtang nagpadayon ang imbestigasyon.

Atol sa pagkahitabo nakalas sila si Professor Leonardo Co kinsa maoy team leader ug consultant sa EDC, Sofronio Cortez, forest guard sa EDC-Environment Management Department ug usa ka Julius Borromeo nga sakop sa Tongonan Farmers Association nga usa sa mga gitabangan sa EDC.

Samtang ang duha nga nakadagan giilang sila si Ronino Gibe, usa ka contractual nga forester sa EDC ug Policarpio Balute nga maoy guide. Ang duha nakadagan gikan sa engkwentro.

Ang rebeldeng NPA sa maong lalawigan mikondenar sa maong hitabo ug mihimakak og kalambigitan sa kamatayon sa tulo ug mipasangil sa militar nga maoy nasayop ug nasaypan ang mga biktima.

Si Tampus nagkanayon nga kun mogawas sa imbestigasyon nga sad-an ang maong mga sundalo mag-atubang gyud sila og kaso ug sila sa Central Command mao mismoy mosang-at og kiha.

Sa pagkakaron padayon pa ang gihimong laboratory testing sa tanang basiyo sa bala nga nakuha diha sa crime scene aron pagtino kun kang kinsang bala gikan ang nakapatay sa mga biktima.

Matud pang Tampus aktibo ang 19th IB sa operasyon batok sa NPA sa maong lugar ug sulod lang sa pipila ka semana nakubkob sa maong batalyon ang 12 na ka mga kampo sa NPA ug nakasakmit og pito ka tag-as nga kalibre sa armas.

Apan bisan paman sa imbestigasyon, magpadayon ang operasyon batok sa mga rebelde diha sa maong lugar tungod kay nagsingabot na ang kasaulogan sa CPP-NPA karung Disyembre 26 nga sagad subhan sa mga rebelde pinaagi sa opensiba.  – BANAT NEWS