Mga batan-on patamno'g lagutmon

CEBU, Philippines - Naglaraw karon ang buhatan sa Cebu City Agriculture nga mohimo og lecture unsaon og pagpananom   og mga lagutmon ug ang mga “out of school youth” maoy target nila niini.

Matud pa ni Assistant City Agriculturist Arlie Gesta nga importante nga matudloan ang mga kabatan-onan og simpleng pagpananom kay usa kini ka alternatibo nga pamaagi sa higayon nga maglisod sila og sulod og trabaho.

Sa sunod buwan, magsugod na ang maong buhatan sa pagpangita og mga batan-on nga mahimong kabahin sa maong programa.

Matud pa niya nga sa kalisod sa panahon karon, kinahanglan nga dunay mahibaw-an ang mga kabatan-onan ug usa niini ang pagbansay-bansay sa industriya sa agrikultura.

 Pormal nga sugdan ang maong proyekto sa unang bahin sunod tuig

“ Kasagaran sa mga tawo naglisod gyud og pagpangaplay og trabaho maong importante gyud gamiton nila ang nakat-onan,” nagkanayon si Gesta.

Sa pagka-karon, padayon ang gihimo nga seminar sa City Agriculture ngadto sa mga bukirang barangay kung diin nagbaha ang mga mag-uuma.

 Nanghinaut usab si Gesta sa mga tulunghaan nga magpadayon unta ang paghingusog sa subject nga Technology and Livelihood Education (TLE) ngadto sa mga tinun-an.

 Aminado hinuon siya nga adunay ubang tulunghaan nga wala motudlo og gardening   gumikan kay nag-agad ra kini sa lugar nga katamnan. – BANAT NEWS