P500 pang-gasolina di suborno

CEBU, Philippines - Nunot niining nagsingabot nga eleksiyon sa Association of Barangay Council kon ABC dinhi sa dakbayan sa Sugbo nga gitakda karung petsa 7 sa buwan sa Disyembre duna nay pipila ka mga kandidato nga interesadong magpapili pagka ABC president ang gikatahong ‘namayad’ og tag P500 sa mga kapitan nga mitambong sa gipatawag niining meeting sa usa ka inilang restaurant dinhi sa dakbayan.

Usa ka kapitan sa usa sa mga barangay dinhi sa dakbayan ang mitug-an sa Banat News apan nagdumili lang pagpaila sa iyang pangalan nga nakadawat siya og P500 human sa iyang pagtambong sa gipatawag nga meeting ni Capitol Site barangay Kapitan Manuel Guanzon niadtong milabay’ng semana.

Sumala pa niini gibanabanang sobra 50 ka mga kapitan gikan sa 80 ka barangay dinhi sa dakbayan ang mitambong sa maong tigom nga gipatawag ni Guanzon.

Si Guanzon nga interesadong magpapili pagka ABC president mikompirmar dihang nahinabi sa Banat News nga nanghatag siya og tag P500 sa mga mitambong apan iyang gi-klaro nga dili kini bayad.

Sumala pa niya kini iya lamang giulian sa pameliti ug pang-gasolina ang mga kapitan nga naghago sa pagsanong sa maong tigom apan kini gikan sa iyang personal nga panudlanan.

Matod ni kapitan Guanzon nga gibahin niya sa duha ka hugna ang maong meeting sa mga kapitan sa usa ka inilang restaurant dinhi sa dakbayan diin 20 ka mga kapitan sa bukirang bahin ang nitambung sa buntag ug pagka hapon moabot usab og 25 ka mga kapitan sa urban areas. Matud ni Guanzon wa siyay laing tuyo gawas pagpahibawo ug pagpailaila sa iyang kaugalingon nga siya magpapili pagka ABC president uban sa iyang kompletong line-up pagka bise presidente, auditor ug pagka mga sakop sa board of directors (BOD).

Gani dugang ni Guanzon nga wala silay laing dinapit gawas sa mga sakop sa iyang lineup ug ang mga bisitang kapitan. Samtang mitambong sab ang secretary ni kanhi kongresista Raul Del Mar nga si Helen Bolabola.

Samtang si Busay barangay kapitan Eliodoro Yody Sanchez sa iyang bahin dihang nahinabi sa Banat News miingon nga kompleto na usab ang iyang lineup ug gani nagtigum na sila niadtong milabay’ng adlaw sa usa sa mga inilang kan-anan dinhi sa dakbayan nga gitambungan usab kini sa sobra 40 ka mga kapitan.

Gipahibawo ni Sanchez nga ang iyang bise presidente mao ang sakop sa media nga si Basak-Pardo barangay kapitan Dave Tumulak ug auditor ang laing mediaman nga si Apas barangay kapitan Ramil Ayuman ug mga sakop sa board sa South nga sila si Tita Cabulao sa Tisa, Daya Calleno sa Buot Taup, Dante Tabucal sa Sudlon-I ug Rudy Estella sa Mambaling. Samtang sa North district mao si Rey Ompoc sa Mabolo, Doming Lopez sa Tinago, Jong Alcover sa Agsungot ug Wilson Bacor sa Binaliw.

Samtang ang lineup ni Guanzon, si Lorenzo Basamot sa Kamputhaw maoy iyang bise-presidente; Petronillo Pat sa Hipodromo pagka-auditor, ug mga sakop sa BOD sa North mao sila si Jerome Lim sa Sta. Cruz, Pancho Ramirez sa Sto. Nino, Nerissa Antolihaw sa Budlaan ug Nieves Narra sa Adlaon, samtang sa South district mao sila si Antonio Carusca sa Pahina-San Nicolas, Vicente Ramos sa Quiot, Susan Enriquez sa Kinasang-an ug Gerson Cadampog sa Pung-ol, Sibugay.

Bugtong si T. Padilla barangay captain Michael Ralota nga interesado usab magpapili pagka-ABC president ang wala pa makaporma sa iyang line-up. Si Ralota ug Guanzon maoy duha ka napilian ni kanhi mayor ug karon Kong. Tomas Osmeña sa maong posisyon. (BANATNEWS)