Young supak sa K-12
CEBU, Philippines - “Dili praktikal” sa kagamhanan ang pagdugang og duha ka tuig sa high school nga gitawag og K-12, sumala ni Bise Mayor Joy Augustus Young.
Sumala pa ni Young nga iyang gisaway ang maong pamaagi gumikan kay nakahatag kini og problema sa mga ginikanan sa bata ilabi na kadtong naglisod sa pagpa-eskwela sa ilang anak.
Dugang pa niya nga nagkuwang karon ang mga classroom sa mga tulunghaan busa mosamot ka-problema ang sistema sa edukasyon kung mapatuman unya ang K-12.
“Ang resulta ana, kay magkagamay na ang mga mo-eskwela. Kung ma-implementar man gani na, wala gyud ta’y mahimo ana, pero huna-hunaon pud unta nila (national government) ang kahimtang sa mga ginikanan ,” matud pa ni Young.
Sumala niya nga daghan pang atimanonon sa sistema sa edukasyon ug usa na niini ang kakuwang og mga laboratory room ug library sa mga tulunghaan.
Samtang si Caralyn Ardenio , 28, usa ka inahan nga nahinabi sa Banat News kagahapon miingon nga nasagmuyo siya og maayo sa pagkahibalo niya kalabot sa K-12.
“Luoy intawon kaayo kaming mga ginikanan ana uy, kami ang mag-antos. Ang dapat i-improve mao ang kakuwang sa mga magtutudlo ug sa mga maayong programa sa gobyerno alang sa mga kabataan. Bisan duna pa sila’y budget para anang programaha, kami mga ginikanan, dili na pud diay nila huna-hunaon?,” suma pa ni Ardenio.
Matud pa niya nga responsibilidad usab sa usa ka ginikanan nga mo-giya sa ilang mga anak aron magtarong kini sa pagtungha. (BANATNEWS)
- Latest
- Trending
