CEBU, Philippines - Giangkon ni Dr. Rene Josef Bullecer, director sa church-based Human Life International (HLI) nga daku og nahimong kadaut ang migawas nga report kabahin sa giingong pamahayag sa Santo Papa Pope Benedict XVI kabahin sa paggamit og condom aron mapugngan ang pagkatap sa sakit nga Acquired Immune Defficiency Syndrome (AIDS).
Apan sa pakighinabi sa Banat News, si Bullecer nagkanayon nga ang migawas nga balita sa nagkadaiyang international news websites dili katuohan ug matud pa niya posibleng nalain lang og sabot ang pamahayag sa Santo Papa.
“Kung imong sabton ang maong statement sa Santo Papa sa iningles, makita nimo nga miasoy ang Santo Papa nga ang paggamit sa condom nagpaila nga responsable ang usa ka tawo ilabi na ngadto sa mga prostitute,” matud pa ni Bullecer.
“Apan wala direkta nga gisulti sa Santo Papa nga pabor sila sa condom tungod kay supak gihapon kini sa tudlo sa simbahan,” dugang pasabot pa niini.
Apan bisan paman og mipagawas na og opisyal nga pamahayag ang Vatican nga miklaro nga dili kini mao ang gipasabot sa Santo Papa, nabatyagan gihapon ni Bullecer nga daku kaayo ang nahimong epekto sa maong balita sa mga paghuna-huna sa mga Pilipino.
“Nakaapekto jud ‘to sa kawsa namo nga mga supak sa Reproductive Health Bill, pero maningkamot mi bisan pa og dako kaayo ang among trabahuon karon aron kumbinsihon ang mga tawo mosupak sa maong balaudnon,” dugang pa ni Bullecer.
Hinuon, may paglaum pa si Bullecer nga mapapas sa huna-huna sa mga Filipino ang pagtuo nga pabor ang Santo Papa sa condom.
Pipila ka adlaw gikan karon gihuwat sa mga Anti-RH Bill group ang pagpagawas og opisyal nga statement sa Catholic Bishops Conference of the Philippines (CBCP) nga mopalig-on sa ilang baruganan batok niini.
Nakita usab nga dakung alas sa mga Anti-RH Bill group ang pagpagawas og pamahayag ni Cebu Archbishop Cardinal Vidal kinsa moabot na karong semanaha gikan sa Roma. (BANATNEWS)