CEBU, Philippines - Anggulo sa ginadiling drugas ang gisubay karun nga motibo sa imbestigasyon sa kapulisan sa pagpamusil patay sa usa ka mahuyang nga gi-ambush sa duha ka mga armadong lalaking sakay og motorsiklo diha sa barangay Matab-ang siyudad sa Toledo kagahapon sa ala 1:10 sa kaadlawon.
Ang biktima mao si Markjun Lim Doleno, 27, nga sumala pa sa kapolisan usa ka mahuyang ug molupyo sa sitio Dakit barangay Awihaw sa maong dakbayan.
Samtang ang drayber sa motorsiklo nga iyang gisakyan mao si Renelon Navarro Diongson, luwas hinuon human sa hitabo ug mitumbok nga duha ka lalaking nagtagsa og motorsiklo nga kolor itom ug pula maoy mipusil sa biktima.
Subay sa imbestigasyon ni PO3 Thule Tajanlangit ang imbestigador sa Toledo City Police ang mga biktima gikan sa lungsod sa Balamban ug paingon na unta kining mamauli.
Apan pag-abot sa maong lugar mihunong kini aron unta pagpalit og sigarilyo sa usa ka tindahan apan kalit lang miabot ang duha ka mga gikatahapan dayun daling mibabag diha sa ilang atubangan.
Tungod niini daling nanganaug sa motor ang mga biktima ug si Diongson ug nanagan pahilayo apan ang duha ka mga mamumuno dali usab kaayung nakanaug sa ilang tagsa tagsa ka motor ug gigukod ug gitabangan og pusil si Doleno.
Si Doleno nga naigo sa iyang bukobuko, kilid nga bahin sa lawas ug tuong bagtak wala na kini makalahutay og dagan pa ug natumba paglakang niini og pipila ka metros, dihang nakita sa mga gikatahapan nga nahagba na kini nagdali silang nanakay sa ilang mga motorsiklo dayung sibat paingon sa lungsod sa Balamban nga direksiyon.
Pag-abot sa mga mirespondeng polis gisuwayan nila kini og hatod sa Toledo City District Hospital apan gideklarar nga dead on arrival.
Anggulo sa ginadiling drugas ang sentro sa imbestigasyon sa kapolisan sanglit ang maong lugar usa usab sa gihulagway sa kapulisan nga daghang drug dens (suyupanan) sa maong siyudad.
Sa paghimo ning balita padayun pa ang manhunt operation sa kapulisan sa mga gikatahapan nga pulos migamit og kalibre .45 ug .9mm pistol base sa na-recover nga upat ka kabhang sa kalibre .45 ug duha ka kabhang sa .9mm pistol. (BANATNEWS)