Po sa pagka-SKF president

CEBU, Philippines - Gipadayag sa Sangguniang Kabataan (SK) chairman sa Barangay Sto. Niño nga si John Philip Po II nga desidido siyang modagan pagka-presidente sa Sangguniang Kabataan Federation (SKF) sa dakbayan sa Sugbo bisan dili pa siya i-endorso sa mga dagkong politiko.

Matud pa ni Po nga pipila na ka mga tsirman sa SK sa nagkadaiyang barangay misaad nga mosuporta kaniya apan nagdumili siya sa pagbutyag sa mga ngalan nila.

“ Kompleto na ang akong grupo, sa pagka-karon , nagpadayon ang pagsuroy-suroy nako sa ubang mga barangay. Okay raman ang kasamtangang SKF nato ron, ang ako lang nga ipadayon nako ang maayo nila nga mga programa kung mapili ko pagka-SKF president,” nagkanayon si Po.

Gitataw ni Po nga wala’y   miduol kaniya nga politiko ug kaugalingon lang niya nga kagustohan nga magpapili sa maong posisyon. Ang mapili nga presidente sa SKF maoy molingkod sa konseho sa dakbayan isip ex-officio member.

Samtang dili na modayon ang SK chairman sa San Nicolas Proper nga si Claudine Nicoles Dakay sa iyang laraw nga modagan pagka-presidente sa SKF. Nagkanayon si Dakay nga   gusto niya nga motutok sa pag-atiman sa mga kabatan-onan sa ilang barangay ingon man usab ang iyang pagtungha.

Hinuon interesado gihapon si Dakay nga mahimong opisyal sa SKF apan sa ubos nga posisyon.

Ang SK chairman usab sa Barangay Guadalupe nga si Erika Diane Panilagao dili na modayon sa iyang laraw nga mahimong opisyal sa SKF apan mipasalig nga mosuporta siya sa kandidatura ni Po. Pipila sa gihugon-hugon nga mga SK chairman nga interesado sa maong posisyon naglangkob kanila ni Aqua Jane Caruzca sa Barangay Pahina San Nicolas, Clarence Jacques Lim sa Tinago, John Eliazar Ruix of Mabolo, Mark Glen Borbajo sa Talamban ug Orlane Quijada sa Punta Princessa.

Ang mapili sa nahisgutan nga posisyon maoy mopuli sa kasamtangang SK Federation president nga si Rengelle Pelayo kinsa mipadayag na sa miaging adlaw nga dili siya mo-endorso ni bisan kinsa nga interesado nga mopapili. (BANATNEWS)