CEBU, Philippines - Nakigkita kagahapon si Ilocos Norte Gob. Imee Marcos kang Cebu Gob. Gwendolyn Garcia sa Kapitolyo, mao na kini ang ikaduhang higayon nga opisyal nga nag-abot ang duha dinhi sa lalawigan, alang sa pinirmahay sa sisterhood agreement tali sa duha ka lalawigan.
Matud pa ni Marcos nga nakighinabi sa mga tigbalita nga ang lalawigan sa Sugbo maoy ikaduha nila nga igsuong probinsiya kun matigayun human sa labing una tali sa Antique.
Maayong mga butang nga gitan-aw ni Marcos sa Sugbo mao ang pagbinayloay sa natad sa turismo, negosyo, edukasyon, kultura ug lakip na ang Information Technology.
Gani iyang gipadayag ang tinguha nga mabutangan og direktang biyahe sa eroplano sa Sugbo ug Laoag sa Ilocos Norte.
Sa iyang bahin si Garcia interesado usab sa renewable energy sa Ilocos Norte pinaagi sa wind power nga nahimo usab nga talan-awon sa turismo sa maong lalawigan.
Si Marcos nagkanayon nga kung may One Cebu si Garcia, hayan iya usab himoon ang One Ilocos Norte sa iyang lalawigan. (BANATNEWS)